Եղունգների սնկային ախտահարումը, որը ի հայտ է գալիս հիմնականում ոտքերի եղունգների շրջանում, հայտնի է նաև օնիխոմիկոզ անվանմամբ։ Սնկային հիվանդությունների պատճառները՝ ծայրանդամների արյան շրջանառության խանգարման հիվանդությունները անուղղակի շփում սնկային հիվանդության կրողի հետ, լողավազաններ, շոգեբաղնիքներ, ցածր իմունիտետ և այլն: Սնկերը կարող են առաջացնել՝ ընդհանուր թուլություն, գլխացավ, սրտխառնոց, գլխապտույտ, խոտատենդ, վերջույթների ռևմատիզմ, դերմատոզներ և այլն: Սնկային ախտահարման առաջին նախանշանը ոտքերի մատների արանքներում ճեղքերի առաջացումն ու հեղուկի արտադրությունն է, քորը, անհարմարության զգացումը, տհաճ հոտը: Սովորաբար սունկը ոտնատակից բարձրանում է թաթի վրա աստիճանաբար փոխելով եղունգների արտաքին տեսքը` սկզբում եղունգների ծայրին դեղին շերտ է առաջանում, իսկ հետո գույնն ամբողջությամբ դեղնամոխրագույն երանգ է ստանում, դառնում ավելի խամրած, փշրվող , աստիճանաբար շերտատվում ու տձևանում: Եղունգը կոշտանում է, իսկ դրա տակ եղջրային զանգված է կուտակվում: Ախտահարման ոչ լիարժեք բուժման դեպքում կա եղունգի դեֆորմացիայի ու կորստի վտանգ: Եթե առկա է նշված խնդիրներից որևէ մեկը, անհրաժեշտ է ինքնաբուժությամբ չզբաղվել և դիմել մաշկաբանին։